Гаилә булырга!
Йөклеләр көне алдыннан Алексеевск үзәк район хастаханәсендә булачак әниләргә ана булуга булышу чаралары турында сөйләделәр
Хатын-кызлар консультациясенә булачак әниләр, табиблар, "Бердәм Россия" партиясе вәкилләре, социаль яклау белгечләре һәм Воскресения Христова гыйбадәтханәсеннән шәфкать туташлары җыелды.
Акушер-гинеколог табиб Эльмира Шакирова бәйрәмнең барлыкка килү тарихы турында сөйләде. Россиядә йөкле хатыннар көне күптән түгел генә билгеләп үтелә башлады. Аны елына ике тапкыр: апрельдә һәм октябрьдә бәйрәм итәләр. Бу көннәрдә "Бердәм Россия" партиясенең "Көчле гаилә" проекты ярдәмендә төрле чаралар үткәрелә. Ә ул рус православие чиркәве инициативасы белән төзелгән.
Баш табиб Илнар Вилданов билгеләп үткәнчә, дәүләт хәзер демография мәсьәләләренә зур игътибар бирә.
"Хатын — кызның төп билгеләнеше-ана булу. Барыгызны да яхшы кәефтә күрү бик күңелле. Сезнең йөклелегегез җиңел һәм тыныч үтүен телим", - дип теләде Илнар Хәмит улы.
Алексеевск муниципаль районында республика матди ярдәм үзәгенең бүлек мөдире Елена Махлатова булачак әниләргә дәүләтнең әниләргә биргән барлык ярдәм чаралары турында сөйләде.
"Безнең районда күп балалы гаиләләр саны артуына без бик шат. Чөнки дәүләт булачак әниләргә һәрнәрсәдә ярдәм итәргә омтыла. Төп субсидияләр һәм ташламалардан тыш, безнең төбәк бүлеге аша гаиләләр ала торган берничә түләүне атарга телим. Авыл җирлегендә 25 яшькә кадәрге беренче балага бер тапкыр бирелә торган 50 мең сум пособие түләнә. Өченче һәм аннан соңгы балага, әгәр әни 29 яшькә кадәр бала тапса, 100 мең сум түләнә. Бу бала туганнан соң 6 ай эчендә рәсмиләштерелергә мөмкин. Шулай ук балалар бакчасы өчен төп һәм өстәмә кайтаруны рәсмиләштерергә мөмкин. Зур өстенлек — пособиеләргә гаризаларны ТР Дәүләт хезмәтләре Порталы аша бирергә мөмкин", - дип уртаклашты Елена Махлатова.