Социаль фонд ярдәмендә MAX мессенджерында 25 меңнән артык татарстанлы цифрлы ID алды
Татарстан Республикасы буенча РСФ бүлеге хезмәткәрләре төбәк халкына яңа цифрлы сервисны үзләштерергә булышты. 2025 елның сентябреннән белгечләр консультациясе пенсионерларны, инвалидларны һәм күп балалы ата-аналарны да кертеп, 25 мең гражданга электрон таныклык булдырырга мөмкинлек бирде.
MAX мессенджерында цифрлы идентификаторны тоташтыру мөмкинлеге Татарстан халкында 2025 елның сентябрендә үк барлыкка килде. Бу вакыт эчендә хезмәттән Россия Социаль фондының төбәк бүлегенең 25 мең клиенты уңышлы файдаланган. Шуларның 13 меңгә якыны-пенсия яшендәге кешеләр, 4 меңгә якыны — инвалидлар һәм 7 меңе — өч һәм аннан да күбрәк бала тәрбияләүче ата-аналар.
Татарстан Республикасы буенча РСФ бүлеге хезмәткәрләре даими нигездә республика халкына яңа сервисны өйрәнергә булышалар. Консультацияләр гади клиент офисларында да, өлкән буын аралашу үзәкләрендә дә уза. Белгечләр MAX һәм «Госуслуги» кушымталарын ничек яңартырга, шулай ук нульдән цифрлы профиль булдыру тәртибен аңлата.
Бүгенге көнгә барлыгы 42 меңнән артык шәхси консультация үткәрелгән. Фонд хезмәткәрләре ярдәме белән 25 меңнән артык цифрлы профиль булдырылды.
«Көмеш» яшьтәгеләр өчен ликбез
Өлкән буын аралашу үзәкләрендә көмеш яшьтәге кешеләр өчен аерым цифрлы грамоталылык дәресләре оештырылган. Дәресләр ике этапта уза. Башта катнашучылар лекция тыңлыйлар, анда электрон документның төп өстенлекләре турында беләләр: ул тулы юридик көчкә ия, хуҗасының барлык мәгълүматларын (ФИА, туган көне, СНИЛС, пенсиянең төрен һәм вакытын) үз эченә ала һәм, кәгазьдән аермалы буларак, аны югалтырга мөмкин түгел, ә үзең белән йөртергә кирәкми — ул һәрвакыт телефонда.
Аннары, остазлар җитәкчелегендә, алар «Госуслуги» порталына керә, документлар булган бүлекне таба, электрон таныклык ача һәм күрсәтү өчен QR-код формалаштырырга өйрәнә.
«Max мессенджерында цифрлы профиль-ул безнең гражданнар өчен мөмкин булган һәм уңайлы сервиска адым. Без татарстанлыларның, бигрәк тә өлкән буынның, яңа мөмкинлекләр белән актив кызыксынуын күрәбез. Республикада яшәүче 25 меңнән артык кеше электрон таныклыкның өстенлеген Татарстан Республикасы буенча РСФ бүлеге хезмәткәрләре ярдәмендә бәяләде инде: аны югалту мөмкин түгел, ул һәрвакыт смартфонда кул астында һәм тулы юридик көчкә ия. Безнең бурыч - кешеләргә хезмәт күрсәтүләрне җиңелрәк һәм тизрәк алырлык инструментларны үзләштерергә ярдәм итү», - дип өстәде РСФ ның Татарстан Республикасы буенча бүлеге идарәчесе Эдуард Вафин.