Авыл бәйрәмнәре чоры
Җәйге чор-теге яки бу авылның Туган көнен үткәрү өчен традицион вакыт.
Узган ял көннәрендә Лебедино халкы Авыл көнен билгеләп үтте.
Яңгыплы һава торышына карамастан, бәйрәмгә җирлекнең күп кенә кешеләре, башка җирләрдә яшәүче кешеләр һәм башка кунаклар җыелды. Мөхтәрәм кунаклар арасында район башлыгы урынбасары Галина Белова да бар иде.
Бәйрәм чаралары халык үзешчәннәре концерты белән башланып китте, концертта катнашучыларга матур кәеф һәм онытылмас тәэсирләр бүләк ителде.
Авыл халкы һәм кунаклары өчен бай программа әзерләнгән иде. Барлык теләүчеләрне тәмле пылау, хуш исле уха, сусыл шашлык белән сыйладылар. Балалар өчен батутлар куелды, күбекле кичә, төрле конкурслар оештырылды, мәсәлән, пневматик винтовкадан төгәллеккә ату. Ә озын буйлы Куян һәм Чебурашка курчаклары балаларны гына түгел, өлкәннәрне дә битараф калдырмады.
Юбилярларны һәм авыл активистларын хөрмәтләү бәйрәмнең төп өлеше булды. Лебедино авыл җирлеге башлыгы Юрий Тюкарев Виталий Александрович белән Мария Дмитриевна Катковларны алтын туйлары белән котлады. Бу көнне шулай ук Моратовлар һәм Герасимовларның күп балалы гаиләләре дә бүләкләр алды.
Актив җәмәгать эшчәнлеге өчен Лебедино авыл җирлеге депутаты Николай Июдинны бүләкләделәр.
Бер көн элек Зирекле авылында православие Преображение Господня бәйрәменә багышланган Авыл көне үткән иде,халык аны алма спасы дип атый.
Район башлыгы Сергей Демидов исеменнән һәм шәхсән үз исеменнән бәйрәмдә катнашучыларга изге теләкләр белән Башкарма комитет җитәкчесенең социаль мәсьәләләр буенча урынбасары Елена Хамзина мөрәҗәгать итте.
Зирекле авыл җирлеге башлыгы Айдар Зиннәтуллин шулай ук авылдашларын һәм кунакларны бәйрәм белән котлады.
Биләр, Шәмә, Муллино авыл мәдәният йортлары артистлары башкаруында җыр һәм бию кебек матур музыкаль номерлар бәйрәм кәефен тудырды. Тамашачылар артистларга кул чаптылар, җырладылар, биергә чыктылар, әйлән-бәйлән уйнадылар.
Теләге булганнар хуш исле алма, бәлеш, тәмле пылау, коймак һәм бал белән чәй белән сыйланды. Янәшәдә мастер-класслар, аквагрим һәм МХО хәрбиләренә ярдәм йөзеннән оештырылган игелек ярминкәсе узды.
Фотографияләр яратучыларга матур бизәлгән фотозоналар ошады.
Традиция буенча бу көнне авылның озын гомерле кешеләрен һәм юбилярларны хөрмәтләделәр.
Ә дүшәмбе көнне Алма Спасын район үзәгендә дә билгеләп үттеләр. Яр буе урамындагы йортлар ишегалдында "Алма спасы"бәйрәме узды. Ишегалларында яшәүчеләр һәм аның кунаклары алдында халык үзешчәннәре чыгыш ясады. Ветераннар советының актив катнашучылары һәм "Зумба-фитнес" бию хәрәкәтендә катнашучылар үзләренең дәртле биюләре белән тамашачыларны сөендерделәр.
Бәйрәм кунакларын тәмле бәлешләр, хуш исле алма белән сыйладылар. Яшь килүчеләр өчен китап кыстыргычлары, брелоклар һәм оригиналь эшләнмәләр ясау буенча мавыктыргыч мастер-класслар оештырылды. Ә аквагрим балаларны әкият персонажларына әверелдерде.