Барысы да мәхәббәттән башлана

Алексеевск районында 60 нчы юбилей парының никахлашу тантанасы узды.

16 августта Алексеевск районы ЗАГС бүлегендә Салават белән Эльвина Вальщиковлар никахлаштылар. Бу көн алар өчен үзенчәлекле булды, чөнки алар Алексеевск районын торгызуга 60 ел тулу елында өйләнештеләр.

Салават белән Эльвина ел ярым элек танышканнар. Алар тумышы белән төрле җирләрдән: Салават — ЗурТигәнәле авылыннан, ә Эльвина-Чистай районыннан. Ләкин язмыш аларны бергә куша. Узган елның апрелендә алар уртак танышлар компаниясендә очрашканнар, һәм шуннан бирле аларның мөнәсәбәтләре бик тиз үсә башлаган.

Пар озак сузмаска һәм үз мөнәсәбәтләрен законлаштырырга карар кыла. Быелның апрелендә алар никах йоласын үткәргәннәр, ә никахны теркәүне тантанага әзерләнергә өлгерү өчен августта үткәрергә булганнар.

«Без туй өчен уңайлы датаны берничек тә таба алмадык. Я ЗАГСта урын бар, ләкин барлык кафелар да мәшгуль, я киресенчә. Шуңа күрә без туйны августта уздырырга булдык. Бу вакыт эчендә барысын да җентекләп планлаштырырга һәм әзерләргә өлгердек», - дип сөйли кәләш.

Никахлашу тантанасында парларның туганнары һәм якыннары катнашты. Мәртәбәле кунак булып Башкарма комитет җитәкчесе Марат Гайсин килде. Ул яңа өйләнешүчеләрне котлады һәм аларга бәхет, гаилә иминлеге һәм никахта үзара аңлашу теләде. Яшь парларга район башлыгы исеменнән истәлекле бүләк тапшырылды.