Милиция тәҗрибәсе - полиция хезмәткәрләренә

Быел Россиядә ЭЭМ ветераннары оешмасының 30 еллыгы билгеләп үтелә.

Алексеевск районында отставкадагы милиционерлар һәм полиция хезмәткәрләре, лаеклы ялда булганда, бүлек һәм район тормышында актив катнашуларын дәвам итәләр. Коронавирус пандемиясе чорында алар янә сафка бастылар, гамәлдәге хезмәткәрләргә узган елның язында кертелгән үз-үзләрен изоляцияләү режимын тәэмин итәргә булыштылар. Шулай ук ветераннар халык дружинасы составына керә һәм массакүләм чараларда тәртип урнаштыруда ярдәм итә. Моннан тыш, ветераннар оешмасы әгъзалары яшьләр белән патриотик эш алып баралар, Бөек Ватан сугышы елларында һәлак булган якташларыбыз истәлеген саклау буенча да актив эш алып барыла. Мондый актив эше өчен алексеевскилылар алты тапкыр Татарстан Эчке эшләр министрлыгының Ветераннар советы бүләкләренә лаек булдылар. 2020 нче ел да искәрмә түгел, аның нәтиҗәләре буенча районның ветераннар оешмасы республикада янә иң яхшысы булды. 

 «Бәйрәм алдыннан барлык катнашучыларны да әлеге истәлекле көн белән котлыйсы һәм безнең оешма активистларын билгеләп үтәсе килә. Алар - Владимир Иванов, Александр Лобанихин, Виктор Мишанин, Галина Березовская, Владимир Мезин. Яшьләрне патриотик рухта тәрбияләүгә Николай Гордеев һәм Андрей Ковшаенко зур өлеш кертә. Александр Солдатовны да билгеләп үтә алмыйча булмый: ЭЭМ бүлек начальнигы булып эшләгән вакытта безнең оешма барлыкка килде. Хәзер ул үзе дә актив катнашучы һәм барлык эшләрдә ярдәмче. Шулай ук аның эшен бүлекнең башка җитәкчесе Владимир Турушкин да дәвам итте. Аларга ярдәм итүләре һәм ветераннар хәрәкәтенә ышаныч белдерүләре өчен зур рәхмәт әйтәсем килә», - ди Алексеевск районы ЭЭМ Ветераннар Советы рәисе Шиһапов Рафис. 

***

«Хөрмәтле коллегалар, кадерле ветераннар! Сезне чын күңелдән бәйрәм – эчке эшләр органнары һәм эчке гаскәрләр ветераннары көне белән котлыйм!

Эчке эшләр органнары ветераннары бүген дә читтә калмый, җәмгыятькә сизелерлек файда китерә. Алар үзләренең бәяләп бетергесез практик тәҗрибәләрен һәм белемнәрен яшьләргә тапшыралар, балигъ булмаганнар арасында профилактик эш алып баралар, полициядә хезмәт күрсәтүне пропагандалыйлар.

Сезгә киләчәктә дә күңел яшьлегегезне саклап калуыгызны, сәламәт, бәхетле булып калуыгызны һәм тормыш юлыгызда әле күп җиңүләр яулавыгызны телим. Яныгызда һәрвакыт туганнарыгыз һәм якыннарыгыз булсын, алар сезне яратсын һәм сакласын, ә йортыгыз җылы һәм уңайлы булсын. Ветераннар хәрәкәтендә катнашуыгыз, авырлыкларны җиңүдә нык торуыгыз, кыюлыгыгыз һәм риясызлыгыгыз, полиция органнарының гамәлдәге хезмәткәрләренә ярдәм итәргә әзерлегегез өчен рәхмәт белдерәм. Сезгә иминлек, тотрыклылык, күп еллар һәм озын гомер телим!».

Радик Әхмәтҗанов,

полиция подполковнигы,

Алексеевск районы ЭЭМ начальнигы

Радик Әхмәтҗанов.