Агросәнәгать комплексы субсидияләре

  2019 елда Татарстанда шәхси ярдәмче хуҗалыкларда  сыерлар асрау буенча субсидияләр 390 млн. сум каралган.

5 февральдә Экология, табигатьтән файдалану, агросәнәгать һәм азык-төлек сәясәте комитеты һәм Татарстан Республикасы Дәүләт Советының Авыл хуҗалыгын үстерү буенча дәүләт программасын гамәлгә ашыруны контрольдә тоту комиссиясе утырышы булды. Парламентарийлар 2018 елда «2013-2020 елларга Татарстан Республикасында авыл хуҗалыгын үстерү һәм авыл хуҗалыгы продукциясе, чимал һәм азык-төлек базарларын җайга салу» дәүләт программасын үтәү йомгаклары буенча фикер алыштылар. Комитет әгъзалары шулай ук ТР Дәүләт Советының РФ Хөкүмәте Рәисе Д. А. Медведевка ил территориясендә Сосновская балтырганы үсүен бетерү буенча дәүләт программасын эшләү зарурлыгы турындагы мәсьәлә буенча мөрәҗәгать проектын хупладылар.

 Узган елгы дәүләт программасын гамәлгә ашыру йомгаклары  белән Татарстан Республикасы авыл хуҗалыгы һәм азык-төлек министры урынбасары Ришат Хәбипов таныштырды. 2018 елда дәүләт программасы чараларын финанслау 20340,6 млн. сум тәшкил итте, шул исәптән 7 334,5 млн.сум федераль бюджеттан.

Кече хуҗалыкларга дәүләт ярдәме 2 млрд. сумнан артык тәшкил иткән. Авыл хуҗалыгы продукциясен сатып алу күләмен арттыру өчен республикада сату, әзерләү һәм эшкәтү буенча 200 дән артык авыл хуҗалыгы кулланучылар кооперативы булдырылды.

• Халык терлекләр санын саклап калсын өчен, узган ел март аеннан субсидия бирелде. Бу сөт бәяләре кимүдән килгән зыянны компенсацияләргә ярдәм итте. Быел бу ярдәм чарасы сакланып калды. Шушы көннәрдә авыл җирлекләреннән исемлекләр җыя башлыйбыз. Республика бюджетында 391 млн. сум каралган, - дип сөйләде докладчы.

 Хәбипов сүзләренә караганда, бер сыер асраучылар өчен компенсация 2 мең сум тәшкил итәчәк, ике сыер – һәрберсенә 3 әр мең сум, өч һәм аннан да күбрәк – 4 әр мең сум.

• Узган ел без халыкның югалган керемнәрен компенсацияләргә ирештек. Сөт бәясе ел башына 13 сумнан 18 сумга кадәр тирбәлде. Ел ахырына күп кенә районнарда ул 17-18 сумга җиткән. Бүгенге көндә авыл хуҗалыгы предприятиеләре буенча өстәлгән бәягә салымны исәпкә алып, алар 19 сумнан 24 сумга кадәр тәшкил итә. Продукциянең сыйфатына һәм күләменә карап, 28 сумга  сатучы предприятиеләр дә бар, - диде Татарстан Республикасы авыл хуҗалыгы һәм азык-төлек министры урынбасары.
• Узган ел Россия төбәкләре арасында җитештерелгән авыл хуҗалыгы продукциясе күләме буенча Татарстан, Ростов һәм Белгород өлкәләреннән калышып, дүртенче урынны алды,   - дип билгеләп үтте Хәбипов. -  Сатудан кергән акча  100,8 млрд. сум тәшкил итте. Авыл хуҗалыгы тармагы рентабельлелеге, барлык субсидияләрне исәпкә алып, 9,5%. 15 һәм 17 процентка җиткән еллар да бар иде. Әмма электр энергиясенә һәм запас частьләргә бәяләрнең ел саен күтәрелүе, салымнарның артуы рентабельлелекне киметте, – диде ул.

 Утырышта шулай ук авыл хуҗалыгы тармагын үстерү, лейкозлы сыерлар көтүен бетерү буенча май ае указларын гамәлгә ашыру турында да сүз булды. Фикер алышуда Вадим Махеев, Рафаэль Юнысов, Елена Минакова һәм башкалар катнашты.

Утырышта комитет әгъзалары Татарстан Республикасы Дәүләт Советының Россия Федерациясе Хөкүмәте Рәисе Д. А. Медведевка Россия Федерациясе территориясендә Сосновская балтырганының  үсүен бетерүдә үсемлекчелектә гадәттән тыш хәлләрне булдырмау буенча Россия Федерациясе дәүләт программасын эшләү кирәклеге мәсьәләсе буенча мөрәҗәгатен дә хупладылар. "Россельхозцентр" ФДБУ мәгълүматлары буенча, 2017 елда илдә балтырган үскән мәйдан -  51 мең гектар, ә 2018 елда инде 80 мең гектар тәшкил иткән. Татарстанда 2017 елда ул - 109 гектарга якын мәйданда, 2018 елда 536 гектарда таралган.

 ТР Дәүләт Советы һәм Татар-информ мәгълүмат агентлыгы