Яшьләр террорга каршы

11 сентябрьдә Алексеевск  аграр колледжы базасында «Экстремизмга –юк!» ункөнлеге кысаларында яшьләр арасында  экстремизмны һәм терроризмны булдырмау буенча II район форумы булып узды. Бу хакта безгә  яшьләр эшләре буенча белгеч һәм ФОРПОСТ оешмасы җитәкчесе Лилия Кашапова җентекләп сөйләде:

• Безнең форумның темасы болай яңгырады: “Экстремизм һәм терроризмны булдырмауның инновацион алымнары”. Чарада районыбызның хөрмәтле кешеләре: социаль мәсьәләләр буенча Алексеевск муниципаль районы башлыгы урынбасары  Чурин Николай Петрович; Алексеевск районы прокуроры Абрамов Павел Валерьевич, Россия Эчке эшләр министрлыгының Алексеевск районы буенча полиция бүлеге начальнигы урынбасары Краснов Александр Степанович; балалар-яшүсмерләр спорт мәктәбе директоры Кәбиров Рөстәм Рәшит улы; «Форпост» яшьләр хокук саклау  хәрәкәте җитәкчесе Кашапова Лилия Юныс кызы; руханилар вәкиле Чехонина Надежда Ивановна һәм аксакал Нургаен Исхаков, шулай ук “Алексеевск станицасы казаклар җәмгыяте атаманы Егоров Юрий Александрович катнашты.

 Форум үзе өч өлешкә бүленгән иде: беренчесендә колледж активистлары яшьләр арасында  экстремизмны һәм терроризмны булдырмауга багышланган театральләштерелгән тамаша күрсәттеләр; форумның икенче өлешендә   чакырылган кунаклар чыгыш ясады. Алар, яшьләргә район, колледж тормышында актив катнашырга, спорт белән  шөгыльләнергә, сәламәт яшәү рәвеше алып барырга, шәфкатьле, мәрхәмәтле, тәртипле һәм намуслы булырга кирәк, дигән бердәм фикердә калдылар.Чараның өченче өлешендә балалар тематик викторинада катнаштылар.