Игенчеләргә ярдәмгә - җыр

2018 елның 16 августы, пәнҗешәмбе

Көзге культураларны урып-җыю төгәлләнде диярлек. Урак соң башлануга да карамастан, игенчеләр срокларга сыеша алдылар. Игеннәрне урып-җыю чорында комбайнчыларга, машина йөртүчеләргә һәм механизаторларга көч-куәт биреп торган мәдәният хезмәткәрләре аларга бу эштә нык булышты.

Авыл мәдәният йортлары һәм клублары артистлары төшке аш вакытында ашханәләрдә игенчеләр алдында чыгыш ясадылар. Ләкин кайчак концертлар басуларда, комбайнчылар янында да оештырылды.

•  Концертлар комбайнчылар һәм аларның ярдәмчеләренең кәефен күтәреп җибәрде, алар җырчыларга һәм музыкантларга  кечкенә генә концерт куйганнары өчен рәхмәт әйттеләр, - дип сөйли район мәдәният йорты методисты Алсу Нәҗметдинова. – Концертларның зур өлеше инде артта калды, һәм без  уңыш алуга күңелебезнең бер өлешен биргәнебез өчен шатбыз. Кагыйдә буларак,   төрле авыл мәдәният йортлары һәм клублары хезмәткәрләре, агитбригадаларга берләшеп, басуларга юл алдылар. Нигездә  игенчеләр, уңыш, Туган ил турындагы җырлар җырланды. Репертуарда мәхәббәт һәм аерылышу турындагы йөрәккә үтеп керә торган җырлар да бар иде. Еш кына дәртле композицияләрдән игенчеләр биеп тә китә иделәр. Мәсәлән, Войкино, Базяково, Левашево, Зирекле, Приозерное, Мораса һәм  Муллино клублары «Востокзернопродукт» бүлекчәләре комбайнчылары алдында чыгыш ясадылар. Кыр Шунталысы, Кыркүл, Коры Көрнәле, Урманасты Шунталысы артистлары «Алексеевск» халык предприятиесе һәм берничә фермер хуҗалыгы хезмәтчәннәрен шатландырдылар. Урта һәм Түбән Тигәнәле авыллары мәдәният хезмәткәре -  «Алга» колхозы, ә аларның хезмәттәшләре Бутлеровка авылы һәм Ивановский бистәсе – «Родина» колхозы эшчәннәре өчен биеделәр һәм җырладылар. Шулай ук Ялкын, Караваево, Лебяжье, Зур Тигәнәле, Әшнәк, Шәмә җырчылары һәм биючеләре дә концерт программасы белән бардылар. Алда әле берничә концерт һәм алар кыр хезмәтчәннәренә авыр эшләрендә булышырлар, дип ышанабыз.