Шагыйрьләр колледжга килде

Район шагыйрьләре һәм күренекле кешеләре белән очрашуга колледж укучылары иҗади караганнар:  алар актлар залына китаплар һәм янып торган шәмнәр  белән киштәләр куйган иделәр. Сәхнәдә Кристина Секалина белән Сергей Конов сокландыргыч вальста бөтерелделәр, студентлар хоры башкаруында йөрәкләргә үтеп керерлек сугыш турындагы җырлар яңгырады. Шагыйрьләребез үзләренең шигырь юлларын укыганчы район башкарма комитеты җитәкчесе урынбасары Николай Чурин сәламләү сүзе белән чыкты. Ул, быел якташыбыз, атаклы татар язучысы Салих Батталның тууына  110 ел тулуны искә төшереп үтте. Николай Петрович чын күңелдән балаларны Әдәбият елы белән котлады һәм районыбызның байлыгы – 25 шагыйрьдән иҗади үрнәк алырга чакырды.