Алексеевск муниципаль районы

Игътибарсызлык нәтиҗәсе

2015 елның 27 феврале, җомга

Алексеевск ЮХИДИ бүлеге начальнигы Илфат Җаббаров сөйләгәнчә, “Лада/Приора” автомобилендә Чистайдан Казан ягына таба юл тоткан Казан вузларының берсендә укучы 20 яшьлек студент каршы як полосага чыгып, “Ауди” автомобиле белән бәрелешә. “Ауди” рулендә Әлмәтнең 29 яшьлек бер хатын-кызы була. Юл һәлакәте нәтиҗәсендә юл-транспорт фаҗигасендә гаепле кешенең (ул да Әлмәттән) уң балтыры – ачык, уң бот сөяге ябык сына һәм ул ябык баш сөяге-ми җәрәхәте ала. “Иномарка”ның 60 яшьлек пассажиры да зыян күрә: ике тубык сөяге ябык сына һәм күкрәк читлеге бәрелә. Ике машина да нык зыян күрә, ике җиңел машинаны ремонтлау да шактый чыгымнар таләп итәчәк.

P.S. Шул ук вакытта беренче фаҗига артыннан ук әлеге хәлгә карап баручы машина йөртүчеләрнең игътибарсызлыгы тагын бер бәрелешүгә китерде. Бу юлы берьюлы биш җиңел машина бәрелеште. Шунысы яхшы, бу юлы зыян күрүчеләр булмады, машиналарны ремонтлауга иминият акчасы җитәргә тиеш.

БАРЛЫК ЯҢАЛЫКЛАРНЫ УКУ