Алексеевск муниципаль районы

Бүләкне кабул ит, ветеран

2015 елның 26 феврале, пәнҗешәмбе

Балалар сәнгать мәктәбендә ир-егетләр көненә багышланган бәйрәм концертына сугыш ветераннары, тыл хезмәтчәннәре, сугыш ветераннарының тол хатыннары һәм аларның туганнары, Әфганстан һәм Чечнядагы сугыш хәрәкәтләрендә катнашучылар чакырылган иде. Җыелучыларны район башлыгы Владимир Козонков һәм «Эпрон» коткару судносы капитаны Денис Бергс сәламләде.

Әлеге чарада кырык ветеранга “1941-1945 еллардагы Бөек Ватан сугышында Җиңүгә 70 ел” юбилей медальләре тапшырылды. Җылы рәхмәт сүзләре белән медальләрне башкарма комитет җитәкчесе Дамир Гыйләҗев, хәрби комиссариат бүлеге начальнигы Дмитрий Дерунов, район башлыгы урынбасары Галина Белова, ветераннар советы рәисе Николай Глазунов һәм шәһәр мэры Александр Харитонов тапшырды.

Районның үзешчән сәнгатьтә катнашучы артистлары ветераннарга уңай тойгылар бүләк иттеләр.

БАРЛЫК ЯҢАЛЫКЛАРНЫ УКУ