Алексеевск районында башкарма комитетның яңа бинасы ачылды
Алексеевск районында башкарма комитетның яңа бинасы ачылды
Татарстан Республикасы Алексеевск муниципаль районының Сахаровка авылында авыл җирлеге башкарма комитетының яңа бинасын ачу тантанасы булды. Объект төзелеше «Авыл җирлекләре башкарма комитетлары (Советлары) биналарын төзү»республика программасы кысасында гамәлгә ашырылды.
Заманча стандартларга җавап бирә торган яңа административ бина авылның үзәк мәйданында, элек төзелгән ФАП һәм авыл клубы белән янәшә урнашкан, алар шулай ук республика программасы буенча төзелгән. Бу халык өчен уңайлы бердәм иҗтимагый үзәк барлыкка китерде.
Ачылу тантанасында дәрәҗәле кунаклар: «Татарстан Республикасы муниципаль берәмлекләре Советы» Ассоциациясе рәисе Әгъзам Гобәйдуллин, ТР Урман хуҗалыгы министры Равил Кузюров, Брест өлкәсенең Ивацевич районы башкарма комитеты рәисе Владимир Белов җитәкчелегендәге Беларусия делегациясе катнашты. Чарада катнашучылар арасында шулай ук Алексеевск районы башлыгы Сергей Демидов, хакимият вәкилләре, подряд оешмасы җитәкчесе һәм җирле үзидарә ветераны Таисия Баһаветдинова да бар иде.
Тантаналы өлеш, алып баручының сәламләү сүзе белән башланып китте, ул вакыйганың авыл үсеше өчен әһәмиятле булуын билгеләп үтте. Аннары Алексеевск районы башлыгы Сергей Демидов, «Татарстан Республикасы муниципаль берәмлекләре Советы» Ассоциациясе рәисе Әгъзам Гобәйдуллин һәм башка рәсми затлар чыгыш ясады. Чара кысасында проектны гамәлгә ашыруга өлеш керткән «Алексеевск МСО - ТАПС» ҖЧҖ төзелеш оешмасы хезмәткәрләренә мактау грамоталары һәм рәхмәт хатлары тапшырылды.
Тантананың кульминациясе Сахаровка авыл җирлеге башкарма комитеты җитәкчесе вазыйфаларын башкаручы Ксения Мигушинага символик ачкыч тапшыру һәм бәйрәм тасмасын кисү булды.
Чара яңа бина буйлап экскурсия белән тәмамланды, катнашучылар билгеләп үткәнчә, ул җирле әһәмияттәге мәсьәләләрне хәл итү һәм Сахаровка халкының тормыш сыйфатын яхшырту өчен мөһим үзәк булачак.
Яңа Башкарма комитет ачылу-Татарстан Республикасының авыл территорияләре инфраструктурасын үстерүдә тагын бер адым, ул хакимиятләрнең авыл халкының ихтыяҗларына игътибарын ассызыклый. Бу «Тормыш өчен инфраструктура » милли проекты максатына туры килә.