Авыл хуҗалыгы тармагын үстерү турында фикер алыштылар
Биләрдә Татарстан Республикасы агросәнәгать комплексы ветераннары берлеге президиумының күчмә утырышы узды.
Очрашуга президиум әгъзалары, Алексеевск муниципаль районының Авыл хуҗалыгы һәм азык-төлек идарәсе башлыгы Газинур Мусин һәм агросәнәгать комплексы ветераннары чакырылган иде.
Очрашу «Юнармеец»яшүсмерләр клубында узды. Утырыш башланыр алдыннан район кунаклары клубның музей экспонатларын карадылар һәм аның җитәкчесе Андрей Чугуров белән аралаштылар. Аннары алар өчен Биләр һәм Шәмә мәдәният йортлары артистлары катнашында кечкенә концерт булды.
Пленар утырышта Газинур Мусин Алексеевск районының социаль-икътисадый үсешенең төп юнәлешләре турында сөйләде. Ул авыл территорияләрен тотрыклы үстерүгә һәм инвестиция проектларын гамәлгә ашыруга аерым игътибар бирелүен ассызыклады.
Президиум утырышында катнашучылар авыл хуҗалыгы тармагы белән бәйле мәсьәләләр буенча фикер алыштылар. Ветераннар үзләренең эксперт фикерләре белән уртаклаштылар һәм җитештерүнең нәтиҗәлелеген арттыру буенча тәкъдимнәр керттеләр.
Ветераннар берлеге рәисе Марс Алиев барлык катнашучыларга эш өчен рәхмәт белдерде һәм Татарстан Республикасы Авыл хуҗалыгы министры Марат Җәббаров исеменнән Рәхмәт хаты һәм Чирмешән районыннан Татарстан Республикасы агросәнәгать комплексының мактаулы ветераны Абүзәр Мортазинга таныклык тапшырды.
Утырыштан соң кунаклар чәчәкләр салу өчен хәрби дан паркына юл тоттылар. Шуннан соң алар страус фермасына барып, анда яшәүчеләр белән таныштылар.