Күчемсез милекне рәсмиләштергәндә актуаль сораулар

Татарстан Росреестры көн саен гражданнарга күчемсез милекне рәсмиләштерү мәсьәләләре буенча консультацияләр бирә. Безнең иң популяр мини-интервьюда ведомство җитәкчесе урынбасары Лилия Борһанова җавап бирде.

- Лилия Барисовна, безнең редакциягә еш бирелә торган сорауларның берсе: йорт урнашкан җир кишәрлеген ничек рәсмиләштерергә?

- РФ Җир кодексы гамәлгә кертелгәнче, ягъни 2001 елның 30 октябренә кадәр бирелгән участокка милек хокукын гадиләштерелгән тәртиптә, әлеге җир участогына гражданның яки элекке милекченең хокукын билгеләүче яки раслаучы документларның берсен тәкъдим итеп рәсмиләштерергә мөмкин. Мондый документ дәүләт акты, җир хокукы турында таныклык, хуҗалык китабы күчермәсе булырга мөмкин. Әгәр андый документлар юк икән, җир участогы урнашкан урындагы җирле үзидарә органы архивына мөрәҗәгать итәргә кирәк. Әгәр дә ул беркайчан да беркемгә дә бирелмәгән икән, аны бирү өчен Башкарма комитетка мөрәҗәгать итәргә кирәк.

- Ә йортны кадастр исәбенә куеп, шул ук вакытта аның хокукын теркәп буламы?

- Күпчелек очракта, мәсәлән, йорт төзелеше, бүлү, берләшү, милектә булган җир кишәрлеген яңадан бүлү тәмамланган очракта), бер үк вакытта кадастр исәбен алу һәм хокукларны теркәү процедурасының мәҗбүрилеге закон белән билгеләнгән. Бу очракта бердәм гариза бирелә. Мондый гаризаны Росреестр сайтындагы шәхси кабинетта яки КФҮ аша бирергә мөмкин.

- Гомер буе күп кенә гражданнар йортның мәйданын арттыралар, мәсәлән, янкорма ярдәмендә. Аны рәсмиләштерү тәртибе нинди?

- Әгәр сүз шәхси торак йорт, шәхси ярдәмче хуҗалык яки торак пункт чикләрендә бакчачылык алып бару рөхсәт ителгән җир кишәрлегендәге торак йорт турында бара икән, мондый торак йортны реконструкцияләгәндә (бу очракта - янкорма кую) «дача амнистиясе» - рәсмиләштерүнең гадиләштерелгән тәртибе кулланыла. Моның өчен техник план әзерләү һәм документлар тапшыру өчен кадастр инженерына мөрәҗәгать итәргә кирәк. Шулай ук закон белән милекченең җирле үзидарә органына мөрәҗәгать итүен күздә тоткан хәбәр итү тәртибе билгеләнгән. Нинди варианттан файдаланырга – граждан үзенә хәл кылырга.

- Әйдәгез, авыл хуҗалыгы җирләрендә торак йорт төзү мөмкинлеге турында сораган укучыларыбызга тагын бер тапкыр җавап бирик.

- РФ Җир кодексында авыл хуҗалыгы билгеләнешендәге җирләрдән файдалану исемлеге төгәл билгеләнгән, һәм бу исемлектә шәхси торак төзелеше буларак файдалану максаты юк. Шуңа күрә авыл хуҗалыгы билгеләнешендәге җирләрдә торак йорт төзү мөмкин түгел.