НАТАЛЬЯ АЛЕКСАНДРОВА – хатын-кыз - бизнес леди
8 Март алдыннан Казанда С. Сәйдәшев исемендәге Зур концертлар залында Халыкара хатын-кызлар көненә һәм «Ел хатын-кызы. Ел ир-аты: хатын-кыз карашы» республика конкурсына йомгак ясалды.
Тантанада Татарстан Республикасы Президенты Рөстәм Миңнеханов һәм Татарстан Республикасы Дәүләт Киңәшчесе Минтимер Шәймиев катнашты.
Рөстәм Миңнеханов билгеләп үткәнчә, Татарстан Республикасында хатын-кызлар төрле өлкәләрдә: мәгариф, мәдәният, медицина, сәнәгать һәм авыл хуҗалыгында актив эшли, фән һәм бизнес белән шөгыльләнә.
«Сезнең башкарган эшләр-зур хезмәт. Без сезнең алда баш иябез. Сезнең гаиләләргә тынычлык һәм татулык телибез», - дип өстәде ТР Президенты.
«Дәүләтнең иң зур байлыгы-хатын-кызлар. Без сезнең белән күп нәрсәгә сәләтле. Матур итеп эшләргә, укырга, балаларны тәрбияләргә һәм шуларда үрнәк булырга», - дип билгеләде Минтимер Шәймиев.
Быел бүләкләү өчен «Ел хатын-кызы» конкурсының махсус билгесе әзерләнгән. Минтимер Шәймиев «Хатын-кыз – ана», «Минем язмышым - минем һөнәрем», «Хатын-кыз - мәдәният һәм рухият», «Хатын-кыз - галим», «Бизнес - леди» номинацияләрендә җиңүчеләргә тапшырды.
«Ел хатын-кызы. Ел ир-аты: хатын-кыз карашы» номинациясендә «Хатын-кыз - бизнес леди» номинациясендә якташыбыз - Кр. Баран авылыннан Наталья Александрова җиңү яулады.
- Минем өчен бу конкурста җиңү – әһәмиятле һәм күңелле казаныш, - дип хис-кичерешләре белән уртаклаша бизнес леди. - Бигрәк тә 8 Март алдыннан Рөстәм Миңнеханов һәм Минтимер Шәймиев катнашында булуы күңелле. Сүз уңаеннан, Минтимер Шәрип улы мине бүләкләгәч, ул: «Мин матурлык конкурсына эләктем ахрысы?» - дип шаяртты. Җиңүчеләр арасында булуым өчен горурлык хисе тоям. Без төрле юнәлештәге егермегә якын хатын-кыз идек. Фермерлар арасында мин бер үзем генә идем.
Наталья сөйләвенчә, гаилә фермасы - ул бик авыр һәм мәшәкатьле эш, ул тәүлегенә 24 сәгать игътибар таләп итә:
- 2000 елда без үсемлекчелек белән шөгыльләнә башладык. Җиде елдан соң халыктан сыерлар сатып алып, сөт юнәлешен үстерә башладык. «Яңа фермер» һәм «Гаилә терлекчелек фермаларын үстерү» фермер эшенә ярдәм итүгә юнәлдерелгән республика программаларында катнаштык.
Гаиләбез белән эшлибез, әти-әниләр дә булыша. Бүгенге көндә безнең хуҗалыкта 175 баш мөгезле эре терлек исәпләнә, шуларның 64е - савым сыерлары. 1 мартка тулаем савым 95,6 тонна тәшкил итте, бер сыердан 1546 кг сөт савылган, узган ел 37 тонна ит җитештерелгән. Бер ел эчендә 78 бозау алдык.
Гаилә фермасында продукцияне уңышлы җитештерү өчен терлекләрне тулы күләмдә азык белән тәэмин итәргә кирәк. Күпьеллык һәм берьеллык үләннәр, арпа, бодай, солы, кукуруз чәчәбез. Гаилә фермасында 5 эш урыны булдырылды, сезон вакытында бездә 10-15 кеше эшли. Бер хезмәткәргә уртача хезмәт хакы 20 мең сум тәшкил итә. Эшчеләребезгә кышка азык әзерләргә булышабыз.
Уллыбыз Никита 2016 елда аграр көллиятне тәмамлап, безнең белән бергә эшли. Күптән түгел ул үзенең КФХ башлыгы булды һәм йөз баш мөгезле эре терлек симертүгә 3 миллион сум күләмендә грант отты.
Хатын-кызга фермер булу җиңел түгел. Кечкенә колхозыбыз бар. Без ирем белән хуҗалыкны шулай дип атыйбыз. Сыер саварга да, дәваларга да, орлыкландырырга да туры килә.
Моның белән бергә Мин бухгалтер да, җитәкче дә. Ире дә үзе ашата, үзе тракторчы, агроном, эретеп ябыштыручы. Авыр вакытлар да булды, кайчан түләргә мөмкинлек юк иде, әмма ирем мине һәрвакыт хуплады. Без аның белән бербөтен. Һәрберебезнең үз якларыбыз көчле, һәм без бер-беребезне тулыландырабыз һәм хуплыйбыз.
Без беркайчан да бер урында тормыйбыз. Башка районнардан килгән эшмәкәрләр белән күп аралашабыз. Йөрибез, башкаларның ничек эшләүләрен карыйбыз, бер-беребез белән тәҗрибә уртаклашабыз. Шулай ук безгә дә күршеләребез, яшь фермерлар, киңәш сорап киләләр.
Фермерлыктан тыш, Наталья үз мавыгуларына да вакыт бирергә өлгерә: заказга тортлар пешерә, җырлый, рәсем ясый, үзешчән сәнгатьтә катнаша. Моннан тыш, ул тирә-юнь авылларда яшәүчеләргә эре мөгезле терлекләрен орлыкландырудан яки дәвалаудан баш тартмый.
Аны лаеклы бүләге белән котлыйбыз һәм Александровлар гаиләсенә иминлек телибез.
Наталья Александрова (уңнан өченче) бкзда бүләкләү тантанасында.
