Мәктәп һәм балалар бакчасы бер түбә астында

Урманасты Шунталысында капиталь ремонттан соң мәктәп ачылды, анда хәзер балалар бакчасы да урнашачак. Белем көнендә балаларны,
 ата-аналарны һәм педагогларны бәйрәм белән район башлыгы Сергей Демидов һәм Татарстан Республикасының Биологик ресурслар буенча Дәүләт комитеты рәисе Федор Батков котлады.
Дәрәҗәле кунаклар балаларга белем туплауларын  һәм яхшы билгеләргә генә укуларын  теләделәр.
Авыл халкы исеменнән республика һәм район җитәкчелегенә рәхмәт сүзләре белән авыл ветераннар советы рәисе, педагогия хезмәте ветераннары, күп еллар мәктәпне җитәкләгән Җөвәйрә Әхмәтҗанова һәм Рабига Ишниязова чыгыш ясады. Бу тантаналы көндә беренче кыңгырауны беренче сыйныф укучылары  Нариман Борһанов һәм Динара Шәйхетдинова бирде.

Тантаналы линейкадан соң Сергей Демидов һәм Федор Батков мәктәп һәм балалар бакчасы бинасын карадылар, алар хәзер бер түбә астында урнашачак.

- Без бу вакыйганы күптән көткән идек, - дип уртаклашты тәрбияләнүче кызның әнисе, - хәзер без тыныч булачакбыз:
 Тәрбияче Эльвира Вәлиева да балалар өчен яхшы шартлар тудырылуы турында сөйләде:
- Бу хакта без хыяллана да алмый идек. Бу бинада идәннәр салкын иде, иске тәрәзәләрдән җил өрә  иде. Җиһазлар һәм уенчыклар да иске иде. Ә биредә барысы да яңа, заманча, бәдрәф бар.  Биредә хәтта уенчыклар да яңа. Бу көнгә кадәр балаларны махсус мәктәп эченә кертмәделәр, сюрприз ясарга теләделәр. Һәм ул килеп чыкты - балалар яңа өйләренә шаккаттылар. Балаларыбызның бәхете өчен көч куйган һәркемгә рәхмәт!
- Мәктәп хәзер бик уңайлы һәм заманча, - ди мәктәп директоры Энҗе Миндубаева. - Хәзер безнең ашханә  беренче катта урнашкан. Бу аш пешерүчеләребезнең хезмәтен бик җиңеләйтәчәк. Ул үзе дә зураеп китте - хәзер укучылар яхшы шартларда ашый алачак. Район җитәкчелеге ярдәме белән бездә заманча парталар һәм уку процессы өчен кирәкле җиһазлар пәйда булды. Барлык педагогия коллективы исеменнән мәктәбебезгә икенче гомер бирүчеләргә зур рәхмәт әйтәм.