АВЫЛГА -ИННОВАЦИЯЛӘР

Кыркүл рухание гаиләсе яшел тәмләткечләр үстерү өчен экобокс иясе булды. Атакай иерей Семен Махортов һәм анакай Регина Татарстан Республикасы аграр яшьләр берләшмәсе үткәргән «Булыша-булыша үстерәбез» республика конкурсында җиңеп чыктылар. 21 майда аграр яшьләр берләшмәсе төркеме Кыркүлгә килеп , ел әйләнәсе яшел тәмләткечләр үстерү җайланмасы тапшырды. Ел дәвамында Махортовлар гаиләсе әлеге җайланмадан файдалана алачак , аның ярдәмендә өй шартларында экологик чиста продукция: салат, укроп, петрушка һәм башка күп кенә үсемлекләр үстерергә мөмкин. Проект шартлары буенча, әгәр бу вакыт эчендә экобокс кирәк булып чыкса, ул гаиләгә бөтенләйгә файдалануга күчәчәк. Аграр яшьләр берләшмәсе рәисе Диләрә Шувалова әйтүенчә, әлеге проект максатларының берсе – авыл халкын авыл хуҗалыгындагы инновацион технологияләр белән таныштыру. Инновацион җайланма ияләре шатлыкларын яшермиләр һәм үзләре өчен яңа эшчәнлек юнәлеше ачарга әзерләр. - Җайланманың ничек эшләвенә төшенгәч һәм беренче уңышны алгач, экобоксны үзебезнең якшәмбе мәктәбенә куячакбыз. Үстерелгән бөтен яшел тәмләткечне без мәхәллә халкы белән аш табынында кулланачакбыз. Ә балалар үсемлекләр үсешен күзәтә һәм яңа технологияләр үзләштерә алачаклар, - ди Семен атакай.