Алексеевскиның мәктәпкәчә балалары һөнәр сайлыйлар

Бөтен һөнәрләр мөһим, бөтен һөнәрләр кирәк Алексеевскиның 1 нче “Ромашка” балалар бакчасына йөрүчеләр һөнәри юнәлеш бирү атналыгы кысаларында ЗАГСта, гүзәллек студиясендә, туристлык агентлыгында, район газетасы редакциясендә, полиция бүлегендә һәм банк бүлекчәсендә булдылар. ЗАГС бүлеге начальнигы Энҗе Сөниева сөйләвеннән балалар әлеге учреждениедә яшьгаилә парларының никахларын теркәүләре турында белделәр. Алар кияү белән кәләш бүлмәсенә, никахлашуны теркәүнең төп залына керделәр. “Стиль” гүзәллек студиясендә Наталья Гусенкова балалар бакчасында тәрбияләнүчеләргә клиентларга хезмәт күрсәтү процессы турында сөйләде һәм кызлар өчен прическаның ничек тиз һәм җиңел ясалуын күрсәтте. “Пегас Туристик” туристлык агентлыгында балалар агентлыкның вазыйфалары, диңгездә ял итү өчен юлламаларның ничек рәсмиләштерелүләре турында белделәр. Директор Гөлназ Маннанова аларга туристлык блокнотлары бүләк итте. «Заря» («Таң») район газетасы редакциясендә мөхәррир Ирина Монина газетаның ничек ясалуы турында сөйләде. Верстальщик Алсу Мәүлетова аларның рәсемнәрен газета битенә салгач, шунда ук анда аларның рәсемнәре килеп чыгуын күреп шаккаттылар. Балалар шулай ук полиция бүлегендә дә булдылар, анда аларга экскурсия үткәрделәр, тәртип сакчыларының авыр һәм куркыныч эше турында сөйләделәр. АкБарс банкында бала-чаганы җитәкче Елена Русакова каршылады. Ул балаларны банкның эше, банкир, кассир, менеджер, консультат кебек белгечлекләр белән таныштырды, банкоматның ничек эшләвен күрсәтте. Балалар кызыксынып тыңладылар, яңа һөнәрләр турында белемнәрен арттырдылар. *** “Кояшкай” балалар бакчасы педагоглары һәм ата-аналар балалар өчен җәяүле экскурсия оештырдылар. Бакчага йөрүче сабыйлар өлкәннәрнең озатуында Ахтыр коесына һәм Чулман елгасының яр буена бардылар. Танып-белү прогулкасы вакытында алар чәчәккә күмелгән бакчаларга карап сокланып кына калмадылар, ә бәлки “Бистәне чиста һәм тәртиптә тот” дигән экологик акция дә үткәрделәр. Балалар бистә кешеләренә листовкалар тараттылар һәм аларны чисталыкны сакларга чакырдылар.