Бөек Ватан сугышында Җиңүгә Татарстанның авыл хатын-кызлары һәм балалары керткән өлеш

Татарстан  Республикасы Авыл хуҗалыгы һәм азык-төлек министрлыгы Бөек Ватан сугышы елларында ТАССР авыл хуҗалыгына багышланган мәкаләләр сериясен бастыруны дәвам иттерә.

Cугыш елларында армия һәм халыкны азык-төлек белән тәэмин итүдә   Татарстанның  әһәмияте   шактый  арта.  Өстәвенә Татарстанның аграр секторында  хатын-кызлар әйдәп баручы көч була. Татарстан колхозларында алар  гомуми хезмәт көннәре санының 70-75 процентын эшлиләр,   совхоз эшчеләренең 75 процентын тәшкил итәләр.

 Мәктәп укучылары да өлкәннәрдән калышмый. Балалар хезмәте   утауда, печән чабуда, ашлык суктыруда, игеннәрне урып-җыюда һ.б.да  аеруча киң файдаланыла. Авыл мәктәпләрендә уку елы тиешледән соңрак башлана.  Татарстанның Теньков районыннан (хәзерге Югары Ослан районы) Әминә Юнысова болай дип искә ала:

-  Сугыш башлангач без 12 яшьтән  ел саен өчәр ай колхозда эшләдек. Бала булуыбызга да карамастан, иртәнге 3-4 тә уяталар иде. Иртән торулары авыр  була иде. Төрле эшләр башкардык. Печән чабуда эшләвебезне хәтерлим: малайлар печән чаба,  ә без баштан төшкә кадәр киптереп өлгерү өчен аны көлтәләргә бәйли, аннары әйләндерә идек, ә кич белән тагын көлтәләргә бәйләдек. Көне буена шулкадәр арый идек ки, кичкә аякларыбызны көч-хәл белән сөйрәп алып, өйгә кайтып егыла идек.