Авыл хуҗалыгы министрлыгы азык-төлек куркынычсызлыгының яңа доктринасы проектын эшләде

Азык-төлек куркынычсызлыгы күрсәткечләренә исәп-хисап ясау методикасын үзгәртү проектның төп яңалыгы булып тора. Аны бәяләү өчен  эчке базарның гомуми күләмендә үзебездә җитештерелгән продукциянең тоткан урыны урынына үз-үзеңне тәэмин итү күрсәткечен файдаланырга тәкъдим ителә. Ул үзебездә җитештерелгән продукция исәбенә базарның эчке ихтыяҗларын канәгатьләндерү дәрәҗәсен чагылдыра һәм 100 процентны узып киткәндә  авыл хуҗалыгы чималы һәм азык-төлекнең аерым төрләренең экспорт потенциалын күрсәтә.

Моннан тыш, халык өчен азык-төлекнең  икътисадый һәм физик үтемлелеген характерлаучы күрсәткечләр кертелә. Икътисадый үтемлелек күрсәткече халыкның урнашкан бәяләр куллануның билгеләнгән нормалары кысаларында җитәрлек күләмдә һәм ассортиментта азык-төлек сатып алу мөмкинлеге күрсәткечен, физик үтемлелек  халыкның сәүдә объектлары мәйданнары белән җитәрлек тәэмин ителешен чагылдыра.

 Проектны әзерләгәндә   фәнни бергәлек  һәм башкарма хакимиятнең кызыксындырылган федераль органнары тәкъдимнәре исәпкә алынды. Проект профиль ведомстволары, Юстиция министрлыгы белән килештерелде һәм  РФ Хөкүмәтенә кертелде. Аның эшләнмәсе, атап әйткәндә, икътисадый санкцияләр китереп чыгарган яңа азык-төлек куркынычсызлыгы куркынычы,  Россиянең Бөтендөнья сәүдә оешмасына керүе һәм Евразия икътисадый берлеге кысаларында  интеграцион процессларны тирәнәйтү белән  бәйләнгән. Проектны Россия куркынычсызлык Советы һәм Президент администрациясе белән килештергәннән соң документ расланачак.