“Урак-2018” әйләнеш ала

Алексеевскида урып-җыю кампаниясенә старт бирелде. Район җитәкчесе Сергей Демидов бу карарны күчмә семинар-киңәшмәдә кабул итте. Ул Ямкино авылы янындагы “ВЗП көньяк Алексеевск филиалы” басуында сишәмбе көнне, 24 июльдә узды.

Бүген өч бөртекле культуралар урып-җыю комбайны эшләп торган басуда хуҗалык җитәкчеләре һәм фермерлар урак башлануга кагылышлы мөһим мәсьәләләрне тикшерделәр. Авыл хуҗалыгы берләшмәләре җитәкчеләре Сергей Демидовка урып-җыюга әзерлек турында җиткерделәр. Мәсәлән, “Родина” һәм “Алга” колхозларында техника 100 процент әзер. Игенчеләр бодайның дымлылыгы урып-җыюга керешергә мөмкинлек бирәчәк вакытны гына көтәләр. Бүген бу хуҗалыкларда һәм башка авыл хуҗалыгы берләшмәләрендә комбайннар басуларга чыкты.

Киңәшмәдә катнашучылар шулай ук ташламалы ягулыкка, куркынычсызлык техникасына, туклануга һәм комбайнчылар эшен стимуллаштыруга кагылышлы мәсьәләләрне күтәрделәр. Авыл хуҗалыгы һәм азык-төлек идарәсе начальнигы Газинур Мусин һәр биш көн йомгаклары буенча иң яхшы комбайнчыларны бүләкләячәкләре турында хәбәр итте. Киңәшмә азагында район җитәкчесе Сергей Демидов көзге культуралар урып-җыюны 25 августка төгәлләү бурычын куйды. Быел урып-җыю кампаниясендә район хуҗалыкларының 90 комбайны эшләячәк.

Бөртекле ашлыкны урып-җыю техникасының әзерлеген билгеләү өчен комиссия төзелде, ул хуҗалык гаражларына һәм паркларына барды. Комиссия хуҗалыкларның уракка әзерлеген күп кенә критерийлар буенча бәяләде. Алар арасында комбайннарның үзләренең, ваклагычларның, ургычларның яки җыйгычларның төзеклеге дә бар. Шулай ук машина янгын сүндерү чаралары белән тәэмин ителгән булырга тиеш. Ә басуда яки машина утарында оператив ремонт бригадалары кизү торачак. Тикшерү йомгаклары буенча “Элита” хуҗалыгы, “Алга”, “Родина” колхозлары һәм “Алексеевск” халык предприятиесе урып-җыюга 100 процент әзер.

26 июльгә басуда 18 комбайн эшли, алар беренче көннәрдә 550 гектар теземнәргә салдылар һәм 1758 тонна ашлык суктырдылар. Уңышлылык һәр гектардан 32,1 центнер тәшкил итә. Газета бастыруга әзерләнгән вакытка басуларда 50 дән артык бөртекле культуралар урып-җыю комбайны эшләде.