Чисталыкны үтәмәгән өчен – штраф 2000 сум

Игълан ителгән төзекләндерү икеайлыгы кысаларында район үзәге һәм авыл урамнарын чистарту дәвам итә. Шул уңайдан Алексеевск шәһәр җирлеге башкарма комитеты җитәкчесе Александр Харитонов бистә халкыннан аңлылык күрсәтүләрен һәм өй яны территорияләрен карап-чистартып торуларын сорый.

Шәһәр җирлеге Советының “Алексеевск шәһәр җирлеге муниципаль берәмлеге территориясен төзекләндерү кагыйдәләрен раслау турында”гы 5 июнь, 2017 ел, 94 санлы карары нигезендә төзү материаллары (ком-чуерташ катнашмасы, ком, кирпеч, ак таш, вак таш, такталар һ.б.ларны), авыл хуҗалыгы продукциясен (печән, салам, тирес һ.б.ларны), сүтеп ташланган техниканы өй янындагы территориягә, шулай ук юлларга бушату һәм саклау тыела. Әлеге  кагыйдәләрне үтәмәгән өчен бозучыларга карата,  административ комиссиягә чакырып, беркетмә төзелә. Штраф иң кимендә  ике мең сум тәшкил итә. Бу кагыйдәләр районның рәсми сайтына һәм Павелкин урамының 18 нче йортында урнашкан шәһәр җирлеге бинасы стендына урнаштырылган. Бүгенге көнгә 171 күрсәтмә бирелде һәм өч беркетмә төзелде инде.

– Хөрмәтле бистә кешеләре, сезгә өй яны территориягезне чиста тотарга: чүп-чардан даими төстә җыештырырга һәм үләнен чабып торырга киңәш итәбез. Шулай ук исегезгә төшерәбез:  зур чүп-чарны (ботаклар, җиһазлар, бәрәңге сапларын)  контейнерларга һәм алар янына илтеп салу тыела, – дип мөрәҗәгать итә алексеевскилыларга Александр Харитонов.