Татарстанда яшүсмерләр арасында тәмәке тартуны һәм вейпингны профилактикалау буенча федераль программа старт ала
Татарстан Республикасында тәмәке тартуны һәм балигъ булмаганнар арасында вейп куллануны профилактикалауга юнәлдерелгән федераль социаль программаны гамәлгә ашыру башлана. Инициатива үсеп килүче буынның сәламәтлеген саклау һәм сәламәт яшәү рәвеше культурасын формалаштыру өчен шартлар тудыруны күздә тоткан «Яшьләр һәм балалар» милли проекты максатларына туры килә.
Программа Татарстан Республикасы Хөкүмәте һәм «Яшүсмерләрнең тәмәке тарту проблемасы буенча Иҗтимагый Совет»төбәкара иҗтимагый оешмасы белән берлектә гамәлгә ашырылачак. Ул ике төп юнәлешне үз эченә ала: балигъ булмаганнарга тәмәке һәм вейплар сатуны булдырмау буенча федераль кампания «Баш тарткан өчен рәхмәт!» шулай ук педагоглар һәм ата-аналар өчен агарту проектын «Башламау мөһим!».
Программаны гамәлгә ашыруга сәүдә, мәгариф, яшьләр һәм мәгълүмат сәясәте өлкәләре өчен җавап бирүче республика министрлыклары һәм ведомстволары, иҗтимагый оешмалар, шулай ук Татарстан Республикасы иреклелек мәгълүмат-ресурс үзәге һәм «Яшь гвардия»җирле бүлеге волонтерлары кушылачак.
Татарстан Республикасы Яшьләр эшләре министры Азат Кадыров сүзләренчә, программаның төп бурычы-яшүсмерләрне тәмәке һәм никотинлы продукциядән яклау өчен көчләрне берләштерү. Балигъ булмаганнарга тәмәке һәм вейплар сатуны тыя торган законнарны төгәл үтәүгә, шулай ук ата-аналар һәм педагоглар өчен заманча профилактик методикалар кертүгә аерым игътибар биреләчәк.
Яшүсмерләрнең тәмәке тарту проблемасы буенча Иҗтимагый совет җитәкчесе Анна Сорочинская билгеләп үткәнчә, яшүсмерләрнең тәмәке тарту дәрәҗәсен реаль киметүгә комплекслы якын килү белән генә ирешеп була. Ул никотинлы продукция белән сәүдә итү кагыйдәләренең үтәлешен контрольдә тотуны, балалар, ата-аналар, укытучылар һәм сатучылар белән агарту эшен, шулай ук җәмәгатьчелекнең актив катнашуын үз эченә ала.
«Баш тарткан өчен рәхмәт!» кампаниясе Россиянең 33 төбәгендә гамәлгә ашырыла инде. Проект кысаларында сату урыннарында сатучылар һәм сатып алучылар өчен мәгълүмати материаллар барлыкка киләчәк, тышкы социаль реклама урнаштырылачак, шулай ук законнар үтәлешенә җәмәгать контроле көчәйтеләчәк. Халык балигъ булмаганнарга тәмәке һәм вейплар сату фактлары турында махсус кайнар линия һәм проектның рәсми сайты аша хәбәр итә алачак.
Агарту проекты «Башламау мөһим!» мәктәпләрдә 6-11 сыйныф укучылары өчен интерактив дәресләр, шулай ук ата-аналар һәм педагоглар өчен белем бирү чаралары үткәрүне күздә тота. Моннан тыш, проектның социаль рекламасы балаларда сәламәт яшәү рәвешенә тотрыклы мотивация һәм тәмәке тартуга һәм вейпингка тискәре мөнәсәбәт формалаштыруга өлкәннәрнең игътибарын җәлеп итәргә тиеш.
Барлык чараларны комплекслы гамәлгә ашыру Татарстанда балигъ булмаганнар арасында тәмәке тарту һәм никотинлы продукция куллануны киметергә мөмкинлек бирер дип көтелә.