Алексеевск укучылары Казанда автоузышларда булдылар
Махсус хәрби операциядә катнашучылар гаиләләреннән балалар Казандагы KazanRing Canyon автодромында узган SMP Formula 4 автоузышлары буенча Россия чемпионаты этабында булдылар.
Сәфәр бай һәм кызыклы булды. Катнашучылар тамашалы узышларны карадылар, автодром төзелеше белән таныштылар, командалар ярышларга автомобильләр әзерли торган техник зонада булдылар, шулай ук күңел ачу чараларында катнаштылар.
Татарстанның яшь узышчысы Әмир Сабиров белән очрашу аеруча тәэсирләр калдырды. 14 яшендә ул инде биш ел автоспорт белән шөгыльләнә һәм югары дәрәҗәдәге ярышларда чыгыш ясый. Балалар кызыксынып пилот белән аралаштылар, аңа сораулар бирделәр, истәлеккә фотосурәтләр ясадылар һәм автографлар алдылар.
Район хакимияте «ГКС» фәнни-җитештерү предприятиесе җитәкчелеге Айрат Илдар улы Сабировка һәм Алексей Дмитриевич Васильевка сәфәрне оештырганнары һәм балаларыбызга игътибарлары өчен рәхмәт белдерә. Мондый чаралар балаларга яңа тәэсирләр бирә, кызыклы кешеләр белән таныштыра һәм үсеш өчен яңа мөмкинлекләр ача.