Татарстанда 1,5 яшькә кадәрге балаларны карау буенча пособиеләр түләүгә 24,2 млн сумнан артык акча юнәлдерелгән

Акчаларны төбәктәге  балалары туган  меңләгән гаилә  алды.

Шунысын да билгеләп үтәргә кирәк, бу пособие әниләр өчен генә түгел. Закон буенча аңа хокуклы:

• әтиләр;
• баланы фактта тәрбияләүче башка туганнар (әбиләр, бабайлар);
• рәсми опекуннар.

Түләүне ничек алырга?

Рәсмиләштерү тәртибе мөрәҗәгать итүченең хезмәт статусына бәйле:

• Эшләүче гражданнар өчен: түләү бала карау буенча отпуск рәсмиләштергәндә автомат рәвештә билгеләнә. Шәхсән беркая да мөрәҗәгать итәргә кирәкми.
• Эшләмәүчеләр өчен: Социаль фондка мөстәкыйль гариза бирергә кирәк. Бу категория гражданнар өчен пособие күләме билгеле һәм аена 10 669,64 сум тәшкил итә.

Мөһим нечкәлекләр

Фонд белгечләре ата-аналарның игътибарын берничә төп моментка юнәлтә:

1.Гаиләгә бер пособие. Әгәр түләү эшләүче гаилә әгъзасына (мәсәлән, эшләүче әтисенә) рәсмиләштерелгән булса, икенче туган (мәсәлән, эшләмәүче әни) инде бу ярдәм чарасын эшләмәүче граждан буларак федераль бюджет акчалары исәбеннән алырга хокуклы түгел.

2.Мохтаҗлыкны бәяләү. Эшләмәүче ата-аналарга пособие һәркемгә дә рәттән билгеләнми. Түләү алдыннан белгечләр мохтаҗлыкны комплекслы бәяли: гаиләнең керемнәрен һәм мөлкәтен тикшерә.

3.Кагыйдәләрдән чыгарма. Түбәндәге категорияләр өчен мохтаҗлыкны бәяләү таләп ителми:

• бала карау буенча отпуск чорында эштән азат ителгән ата-аналар (оешма ябылуга бәйле рәвештә);
• эш бирүчене бетерү аркасында йөклелек яки йөклелек һәм бала табу буенча отпуск вакытында эштән азат ителгән аналар;

көндезге бүлектә белем алучы студентлар (һөнәри һәм югары уку йортлары).

Ничек гариза бирергә?

Процедура максималь гадиләштерелгән. Хезмәт «Госуслуги»бердәм порталында гамәлгә ашырылган. Күпчелек очракта өстәмә документлар бирү таләп ителми. Әгәр белгечләргә төгәлләштерүләр кирәк булса, мөрәҗәгать итүчегә сорала торган кәгазьләр исемлеге белән хәбәрнамә җибәреләчәк.

Җитәкче комментарие

«Безнең бурыч — кечкенә балалары булган һәр гаилә тиешле ярдәмне вакытында һәм артык кыенлыкларсыз алсын өчен эшләү. Шуңа күрә без даими рәвештә пособиеләр рәсмиләштерү тәртибен аңлатабыз, документлар белән ярдәм итәбез һәм гаризаларны теләсә нинди уңайлы форматта — "Дәүләт хезмәтләре" аша онлайн яки шәхсән төбәк клиент хезмәтендә һәм КФҮ аша кабул итәбез», — дип ассызыклады Россия Социаль фондының Татарстан Республикасы буенча бүлеге идарәчесе Эдуард Вафин.

Республика халкы яшәү урыны буенча РСФ клиент хезмәтләрендә яисә күпфункцияле үзәкләрдә(КФҮ) пособиеләрне билгеләү мәсьәләләре буенча җентекле консультация алырга мөмкин.