Алексеевск районында хуҗалык этләрен теркәү дәвам итә

Алексеевск районында хуҗалык этләрен мәҗбүри теркәү дәвам итә. Чара торак пунктлар территориясендә хайваннарның иминлеген тәэмин итүгә һәм тәртип саклауга юнәлдерелгән.

Бүгенге көндә районда 1438 эт теркәлгән, шул исәптән: Алексеевск шәһәр тибындагы поселогында — 339, Биләр авылында — 140, Лебяжье авылында — 79.

Чиплау хайванны идентификацияләүнең ышанычлы ысулы булып тора һәм хайванны югалткан очракта хуҗасына кире кайтарырга мөмкинлек бирә. Моннан тыш, теркәлү Россия Федерациясеннән читкә чыкканда ветеринария документларын рәсмиләштерү өчен дә кирәк.

Микрочип кертү процедурасы куркынычсыз, авыртусыз һәм хайван сәламәтлегенә тискәре йогынты ясамый.

Этне дәүләт ветеринария клиникасында, күчмә пунктларда, шулай ук шәхси хуҗалыкларда планлы тикшерүләр үткәргәндә теркәргә мөмкин. Үзең белән Россия Федерациясе гражданины паспорты, ИНН һәм СНИЛС булырга тиеш.

Чиплау шулай ук шәхси ветеринария клиникаларында да мөмкин. Бу очракта дәүләт системасына белешмәләр кертү өчен хуҗага дәүләт ветеринария хезмәтенә мөрәҗәгать итәргә кирәк.

Профильле хезмәтләр этләрне теркәү һәм йөртү буенча таләпләрнең үтәлешен контрольдә тоту максатыннан даими рейдлар үткәрәчәк. Билгеләнгән кагыйдәләрне бозган өчен җаваплылык каралган: беренче тапкыр бозган очракта — кисәтү яисә 2 меңнән 4 мең сумга кадәр административ штраф, ел дәвамында кабат бозган очракта — 5 мең сум штраф.

Өч айдан өлкәнрәк этне сатып алганнан соң 30 көн эчендә теркәргә кирәк. Көчекләр өч айга җиткәнче чиплаштырылырга тиеш.

Алексеевск районы дәүләт ветеринария хезмәтенең элемтә өчен телефоны: +7 (84341) 2-61-35.