2026 ел башыннан вакытлыча эшкә яраксызлык буенча һәм йөклелек һәм бала табуга бәйле максималь һәм минималь түләүләр артты
Йөклелек һәм бала табу буенча пособиенең максималь күләме арттырылды һәм 140 көнлек стандарт ял дәвамлылыгы белән 955 836,00 сум тәшкил итә. Ялның шул ук дәвамлылыгында пособиенең минималь күләме йөклелек һәм бала табу буенча ялга хокук башлану вакытына тулы ставкада эшләү шарты белән 124 702,20 сум тәшкил итә.
Йөклелек һәм бала табу буенча пособиене исәпләү өчен булачак ананың иминият очрагы (йөклелек һәм бала табу буенча отпуск) башланганчы ике ел эчендә хезмәт хакы исәпкә алына. Ике ел эчендә хезмәт хакы 730 яки 731 көнгә бүленә, әгәр исәп-хисап чорында кәбисә ел булса. Гомуми көннәрдән йөклелек һәм бала табу, бала карау, шулай ук эшкә яраксыз булу чорлары төшереп калдырыла, әгәр мондый очраклар алдагы ике ел дәвамында булган булса. Әлеге пособиене исәпләгәндә иминият стажы исәпкә алынмый, түләү һәрвакытта да уртача хезмәт хакының 100% ын тәшкил итә.
Эшкә урнашкан затлар үзләренең уртача хезмәт хакыннан чыгып, вакытлыча эшкә яраксызлык буенча пособиенең максималь суммасы быел көненә 6 827,40 сум тәшкил итә.
Хезмәт хакы билгеләнгән минималь хезмәт хакы күләменнән (МРОТ) түбәнрәк яисә иминият стажы 6 айдан кимрәк булган очракларда уртача көнлек хезмәт хакы МРОТтан исәпләнә. 01.01.2026 елдан МРОТ арттырылды һәм 27 093,00 сум тәшкил итте, бу эшкә яраксызлык буенча түләүләрнең минималь күләмен арттыруга йогынты ясады.
«Вакытлыча эшкә яраксызлык буенча пособие күләме иминият стажына һәм хезмәткәрнең хезмәт хакына бәйле-ул индивидуаль рәвештә исәпләнә. Исәпләгәндә иминият очрагы башланган елга кадәрге ике календарь ел өчен хезмәт хакы исәпкә алына. Көнлек уртача хезмәт хакы хезмәт хакы суммасын 730 га бүлү юлы белән билгеләнә, шуннан соң хезмәткә сәләтсезлек көннәренә тапкырлана. 8 елдан артык стаж булганда - уртача хезмәт хакының 100% ы, 5 елдан 8 елга кадәр стаж булганда – уртача хезмәт хакының 80% ы, 5 елдан азрак стаж булганда — уртача хезмәт хакының 60% ы түләнә», - дип билгеләп үтте Россия Социаль фондының Татарстан Республикасы буенча бүлеге идарәчесе Эдуард Вафин.
2025 елда вакытлыча эшкә яраксызлык буенча пособиеләрне түләүгә РСФ ның Татарстан Республикасы буенча бүлеге 18,6 миллиард, йөклелек һәм бала табу буенча пособиеләргә 5,1 миллиард сумнан артык акча җибәрде.