Киләсе ел уңышына хәзердән үк әзерлек

Алексеевск районында көзге бодайны чәчү дәвам итә.                                                Лебедино янындагы кырда Алексеевск халык предприятиесенең        3 чәчү комплексы эшли.

546 гектар мәйданда ашлык белән бергә ашлама да кертелә. Бик куәтле тракторлар руле артында тәҗрибәле механизаторлар: язгы чәчү батыры Михаил Кузьмин, Александр Астафьев һәм яшь егет Александр Коновалов эшли. Алар һәркайсының киңлеге 12 метр булган «Хорш Пронто» чәчү агрегатларында эшлиләр, бу көненә 250 гектар тирәсе мәйданны чәчәргә мөмкинлек бирә. Ашлык һәм ашламаны өзеклексез аларга шоферлар Юрий Рыков, Сергей Краснов һәм Александр Шевелев китереп тора.

«Нәкъ менә шушы кырда сәгать 10да эшли башладык, чөнки күчеп йөрдек, техниканы көйләдек, ә гадәттә иртәнге 6-7дә башлыйбыз һәм яңгырларга кадәр мөмкин кадәр өлгерү өчен караңгыга кадәр эшлибез. Чәчәр алдыннан бу кырда туфракны дискатор, ике «Сан флаер» агрегаты һәм катковаль дигән агрегат белән эшкәртәләр. Хәзер бу машиналар Зур Полянка авылындагы телевышка янындагы кырда эшлиләр, монда чәчүне тәмамлыйбыз, аннары күчәбез. Ә бу бригада башка кырга китәчәк», - ди агроном Мурат Гибадуллин.       

Родники механизаторы Михаил Кузьмин өчен бу инде кырда кырыгынчы сезон. Бу елларда хуҗалыкның берничә исеме, милек формасы, хуҗалары үзгәрә, ә ул элеккечә һөнәренә, туган җиренә тугры кала. 

«1983 елда комбайнчы ярдәмчесе булдым, 1986 елда армиягә киттем, өч ел флотта хезмәт иттем, ә кайткач яңадан кырга чыктым. Мин әле дә монда эшлим. Көненә гадәттә 100 гектар чәчелә, яз көне күбрәк тә килеп чыга, чөнки көн дә озын,   эшчеләр дә күбрәк, ә хәзер аларның күбесе урып-җыюда. Мин эшләгән Кировец уңайлы, тавышны үткәрми торган, кондиционерлы, магнитолалы. Кабинада навигатор бар, ул кайсы полосада чәчәргә кирәклеген күрсәтә, чәчү агрегатында күпме ашлык һәм ашлама калганын, нинди норманы тотарга кирәклеген күрсәтүче датчиклары бар. Иске тракторлар белән чагыштырганда  – бу самолет», - дип уртаклашты фикерләре белән механизатор.