Изге бәйрәм алдыннан Биләрдә мәчет ачылды
Бүген Биләр авылында яңа мәчет ачылу тантанасы булды. Авыл мөселманнары өчен бәйрәм чарасында район башлыгы Сергей Демидов, Татарстан Республикасы мөфтие Камил Сәмигуллин, «Алексеевскдорстрой» директорлар советы рәисе Фоат Вәлиев һәм ТР Дәүләт Советының Бюджет, салымнар һәм финанслар комитеты рәисе урынбасары Камил Нугаев катнашты.
Ничек иде
Яңа мәчет төзелгәнче намазлар гыйбадәт йортында башкарыла. Бина дин тотучылар өчен җайлаштырылган иде, ләкин барлык дин тотучыларны сыйдыра алмады. 2019 елның 28 октябрендә Биләр җирендә Аллаһ йортына нигез салынды.
Ничек булды
«Алексеевскдорстрой» предприятиесе акчасына бер елдан да ким вакыт эчендә яңа таш мәчет төзелде, ул пәнҗешәмбе көнне кунаклар һәм дин тотучылар өчен ишекләрен ачты. Шул ук көнне биредә беренче намаз укылды. Яңа мәчет 30 кешене сыйдыра ала.
Тәбрикләү
Район башлыгы Сергей Демидов Биләр җирлегендә яшәүчеләргә мөрәҗәгать итте: «Бүген сезнең зур бәйрәм, вакыйга. Биләрнең борынгы җирендә, сезнең җирлек территориясендә мәчет барлыкка килде. Аның бөтен мөселман өммәтен үзенә тартып тору урынына әйләнәчәгенә шик юк. Төзүчеләргә һәм меценатларга һәрьяклы катнашканнары һәм намуслы хезмәтләре өчен рәхмәт әйтәсе килә. Бу изге эшкә керткән өлешегез өчен сезгә савап булсын». Камил Сәмигуллин җыелучыларны бу бөек көн белән котлады һәм вәгазь белән чыгыш ясады. Ул үз чиратында дин тотучыларны традицион диннең чын юлын сакларга чакырды, катнашучыларга һәм барлык кешеләргә тынычлык теләде, бәйрәмнең мәгънәсен, бөеклеген һәм әһәмиятен билгеләп үтте.
Биләр халкын «Алексеевскдорстрой» предприятиесе директорлар Советы рәисе Фоат Вәлиев та котлады, ТР Дәүләт Советы депутаты: «Бу мәчет иман һәм тынычлык уты белән тулсын. Ул беркайчан да буш тормасын. Безнең район күп милләтле. Һәм бу безнең көч. Барыгызга да игелек һәм гармония телим».
Алексеевск районы мөхтәсибе Рөстәм хәзрәт Вальщиков диндәшләренә шушы якты һәм әһәмиятле вакыйга белән ихлас котлаулар белән мөрәҗәгать итте: «Бу мәчет иң мөһим рухи үзәк, мәгърифәт чыганагы, гуманистик идеяләр, чын, хак ислам кыйммәтләре тарату чыганагы булачак, гыйлем һәм рухиятне алып барачак, мөселманнарның гына түгел, башка дин кешеләренең дә тырышлыкларын берләштерәчәк. Коръәндә әйтелә: «Бер-берегезне игелекле эшләрдә уздырырга тырышыгыз», - дип.
Бүләкләү
Алексеевск районы мөхтәсибәтенең Биләр авылы мәхәлләсен төзүдә сыйфатлы һәм намуслы хезмәтләре, югары җаваплылык һәм эшне төгәл оештырулары өчен Татарстан Республикасы Мөселманнары Диния нәзарәте «Стройдорсервис+» ҖЧҖ балта остасы Ирек Нуриҗан улы Сәләхиев һәм «Стройдорсервис+»ҖЧҖ штукатур – маляры Әминә Зыятдин кызы Падиярова район башлыгының Рәхмәт хаты белән бүләкләнделәр. Шулай ук район башлыгы Сергей Демидов Фоат Вәлиевнең мәдәни бинасы төзелешенә керткән өлеше өчен рәхмәт белдерде: «Алексеевск районы мөхтәсибәтенең Биләр авылы мәхәлләсен төзегәндә меценатлык эшчәнлегегез өчен Сезгә рәхмәт белдерәм. Фоат Вәлиевич, сезгә чын күңелдән нык сәламәтлек, бәхет, гаилә иминлеге һәм башкаларга бирелгән игелекләрегез артып, сезгә кайтсын». Алексеевск районы мөхтәсибәтенең Биләр авылы мәхәлләсенә акчалата сертификат тапшырылды.
Сүз-Биләрдә яшәүчеләргә
«Шатлыгыбызны тулысынча белдерү өчен сүз юк. Аллаһы Тәгалә безнең догаларыбызны ишетте һәм хәзер безнең җирдә дә Аллаһы Тәгалә йорты барлыкка килде. Әлеге мәчетне төзүчеләргә Аллаһ әҗерләрен бирсен. Аларга һәм аларның гаиләләренә сәламәтлек телим», – дип уртаклашты Зөлфия Ибраһимова. Яңа мәчет ачылу тантанасыннан соң ук беренче гыйбадәт кылынды.